SPAK, me urgjencë në Berlin për “tradhtinë” e kreut të OFL

5 TETOR 2020

Prokuroria Speciale kundër Krimit të Organizuar dhe Korrupsionit, po vijon intensivisht hetimet mbi kreun e shkarkuar të OFL-së, Artan Shkëmbi, pas dyshimeve për dekonspirim në lidhje me një rrjet kriminal shqiptar në Gjermani.

Një prokuror nga SPAK do të niset në Gjermani për të shqyrtuar në vend të gjitha dyshimet e partnerëve në lidhje me këtë aferë.

Deri më sot, SPAK por edhe SHÇBA ka arritur vetëm të gjejë një ndërhyrje të Shkëmbit në sistemin TIMS, gjë që në fakt nuk se inkriminon.

Madje avokati i tij, Artan Broci, ka deklaruar se kjo nuk tregon asnjë gjë, pasi është puna e një oficeri të lartë policie që të punojë me aplikacionet që ofron sistemi.

Ende nuk bëhet e ditur se kush do të shkojë në Berlin, por sipas gjasave do të jetë vetë titullari i hetimeve mbi Artan Shkëmbin. i cili do të ketë takime jo vetëm në Policinë Federale Kriminale të Gjermanisë, por edhe me homologë të Prokurorisë, të cilët kanë hapur hetimet apo urdhëruar përgjimet ndaj bandës shqiptare të narkotrafikut.

Mësohet se personat që janë njoftuar nga Artan Shkëmbi për hetimet gjermane, janë Aleksandër Prroni dhe Klaudio Vukaj. Mesazhi i Artan Shkëmbit për dy të kërkuarit për trafik kokaine është dërguar nga godina e Policisë së Shtetit, sipas prokurorisë gjermane. Hetuesit gjermanë kërkuan verifikim të pasurive për shtetasit Aleksandër Prroni dhe Klaudio Vukaj, që të dy me banim në Gjermani. Pas mbërritjes së letërporosisë nga policia gjermane, burimet ne fjalë thanë, se pala shqiptare u ka kthyer përgjigje gjermanëve në 22 prill. Ndërkohë që vijonin hetimet ndaj Prronit dhe Vukajt, të cilët kanë qenë në përgjim nga autoritetet gjermane, dhe u zbuluan të tjera prova që implikonin drejtuesit e policisë shqiptare.

@GazetaShqip